വിജയദശമി ദിവസത്തിൽ ആർഷവിദ്യാസമാജം സ്ഥാപകൻ ആചാര്യശ്രീ കെ ആർ മനോജ് ജി നൽകുന്ന സന്ദേശം !
പരമശിവൻ, പരാശക്തി, മഹാവിഷ്ണു, ബ്രഹ്മാവ്, ഗണപതി, സുബ്രഹ്മണ്യൻ, ശാസ്താവ്, ഇന്ദ്രൻ, മിത്രൻ, അഗ്നി, നാരായണൻ, രാമൻ, കൃഷ്ണൻ, പരമാത്മാവ് എന്നിങ്ങനെ പല പേരുകളിൽ വിശേഷിപ്പിക്കപ്പെടുന്ന പരബ്രഹ്മതത്വത്തെയാണ് സനാതനധർമ്മത്തിൽ ശ്രീപരമേശ്വരൻ എന്ന് വിളിക്കുന്നത്.
ശുദ്ധബോധചൈതന്യാനന്ദസ്വരൂപനായ ഈ പരമതത്വത്തിന് ലിംഗഭേദമില്ല, അതായത് പരമ്പൊരുൾ പുരുഷനോ സ്ത്രീയോ അല്ല. അദ്ദേഹത്തിന് ശരീരങ്ങളേയില്ല. പരമേശ്വരൻ അകായനും (സ്ഥൂല – സൂക്ഷ്മ – കാരണശരീരങ്ങളില്ലാത്തവൻ), നിരാകാരനും (ആകൃതി, അഥവാ രൂപങ്ങളില്ലാത്തവൻ), നിരവയവനും (അവയവങ്ങളില്ലാത്തവൻ) ആണ്.
പ്രകൃതിയുടെ സത്വം (പ്രകൃതിയുടെ ബോധം, ക്രമം, Consciousness, ചൈതന്യം) രജസ് (പ്രകൃതിയുടെ ഊർജം-energy) തമസ് ( ജഡം, ദ്രവ്യം (Matter) എന്നീ മൂന്നു ഗുണങ്ങളോ അതിൻ്റെ പരിമിതികളോ ബാധിക്കാത്ത തത്വമായതിനാൽ ശ്രീ പരമേശ്വരനെ നിർഗുണൻ, ത്രിഗുണാതീതൻ, നിരഞ്ജനൻ എന്നെല്ലാം വിളിക്കുന്നു.
പരമേശ്വരൻ്റെ മറ്റൊരു നാമമാണ് സനാതനൻ എന്നുള്ളത്. നിത്യശുദ്ധ-നിത്യ മുക്ത-നിത്യബുദ്ധഭാവമാണ് സനാതനത്വം..
ഈ വിശ്വം, കാലം, ജീവികൾ എന്നിവ ഉണ്ടാകുന്നതിന് മുമ്പും ഉണ്ടായിരുന്നവൻ- പിന്നീട് ലോകം, കാലം, ജീവികൾ എന്നിവ ആവിർഭവിക്കുമ്പോഴും പരിണമിക്കുമ്പോഴും തൻ്റെ സ്വഭാവത്തിലോ ശക്തി വിശേഷങ്ങളിലോ മഹിമയിലോ യാതൊരു മാറ്റവും വരാത്ത അവ്യയൻ – അവസാനം ഉണ്ടായതിനെയെല്ലാം തന്നിൽത്തന്നെ ലയിപ്പിച്ച് ഏകമാത്ര സത്യസ്വരൂപനായി നിലകൊള്ളുന്ന കേവലൻ – ഈ ഗുണങ്ങളെല്ലാമുള്ളതിനാലാണ് പരമേശ്വരൻ സനാതനനായത്‌.
എന്നാൽ ഈശ്വരൻ്റെ പ്രത്യക്ഷദർശനത്തെയും സനാതനധർമ്മം അംഗീകരിക്കുന്നു. പരമേശ്വരൻ പരാശക്തി കൂടിയാണ്. എല്ലാ ശക്തികളും അടങ്ങിയ സർവ്വശക്തിത്വഭാവത്തെയാണ് പരാശക്തി എന്നു വർണ്ണിച്ചിരിക്കുന്നത്. തൻ്റെ മഹിമയ്ക്കും വിഭുത്വത്തെയും ബാധിക്കാത്തതെല്ലാം ചെയ്യാൻ കഴിയുന്ന അവസ്ഥയാണ് സർവ്വശക്തിത്വം. സർവ്വശക്തിത്വം ഉള്ളതിനാൽ ലോകത്തിൻ്റെയോ കാലത്തിൻ്റെയോ ജീവശരീരങ്ങളുടെയോ പരിമിതികളോ നിയമങ്ങളോ ബാധിക്കാത്ത തരത്തിൽ സഗുണനും സാകാരനും ആകാനും പരമേശ്വരന് കഴിയും. സാധകന്മാർക്കും ലോകത്തിനും വേണ്ടി പരമേശ്വരൻ അവയവങ്ങളോട് കൂടിയ (സാവയവിയായി) സാകാരപ്രത്യക്ഷഭാവം നിരവധി സ്വീകരിച്ചതായി ഋഷികൾ സൂചിപ്പിക്കുന്നു. അങ്ങനെ തൻ്റെ സർവ്വശക്തിത്വത്താൽ അദ്ദേഹം സ്വീകരിക്കുന്ന രൂപങ്ങൾ/അമ്മയ്ക്കും അച്ഛനും ജനിക്കാത്ത ശരീരങ്ങൾ/ആണ് ഈ പ്രത്യക്ഷ ശരീരങ്ങൾ. ഇച്ഛാമാത്രയിൽ പ്രത്യക്ഷപ്പെടാനും അപ്രത്യക്ഷമാകാനും കഴിയുന്ന ഇത്തരം ശരീരങ്ങളെയാണ് ഭവരൂപം, ദിവ്യദേഹം, മായാരൂപം, വിഭൂതിശരീരം, ലിംഗശരീരം എന്നെല്ലാം പരാമർശിക്കുന്നത്.
സനാതനധർമ്മം, യോഗവിദ്യ, തന്ത്രവിദ്യ, വേദാന്തം, സിദ്ധാന്തം എന്നിവ മനുഷ്യരാശിയ്ക്ക് നൽകാനായി ആർഷഗുരുപരമ്പരകൾക്കു മുന്നിൽ പ്രത്യക്ഷപ്പെട്ട ദക്ഷിണാമൂർത്തി അങ്ങനെയൊരു പ്രത്യക്ഷമൂർത്തിയാണ്. അദ്ദേഹത്തെത്തന്നെയാണ് ജ്ഞാനമൂർത്തി, വേദമൂർത്തി, ആദിനാഥൻ, ആദിയോഗി, ശിവഋഷി, ശിവശങ്കരഋഷി, ശ്രീകണ്ഠരുദ്രൻ, നീലകണ്ഠരുദ്രൻ കൈലാസനാഥൻ എന്നൊക്കെ വിവിധ പരമ്പരകൾ പ്രകീർത്തിക്കുന്നത്. നരസിംഹമൂർത്തി, ഗജമുഖഗണപതി, ദുർഗ, ധ്യാന ശ്ലോകങ്ങളിൽ വർണിക്കുന്ന തരത്തിലുള്ള മൂർത്തികൾ തുടങ്ങിയവയെല്ലാം ഇങ്ങനെയുള്ള പ്രത്യക്ഷദർശനരൂപങ്ങളാണ്.
താന്ത്രികപദ്ധതിയിൽ സാധകന്മാരും ഭക്തന്മാരും മാതൃഭാവത്തിലാണ് പരാശക്തിയെ ചിത്രീകരിക്കുന്നത്. സ്നേഹമയിയായ അമ്മയുടെ ഭാവത്തിൽ പരമേശ്വരനെ സമീപിക്കുന്നത് പലർക്കും ഏറെ സൗകര്യമാണ്. ശ്രീരാമകൃഷ്ണ പരമഹംസർ, ശ്രീ പരമഹംസ യോഗാനന്ദ ജി തുടങ്ങിയവർ ആദ്യകാലങ്ങളിൽ ഈ വിധമാണ് ഉപാസിച്ചിരുന്നത്.
ഈശ്വരനെ അച്ഛനും, അമ്മയും ഗുരുവും സുഹൃത്തുമായി കാണുന്ന പാരമ്പര്യം സനാതനധർമ്മത്തിൻ്റെ മാത്രം പ്രത്യേകതയാണ്. കലാസാഹിത്യാദി വിദ്യകളുടെ അധിഷ്ഠാനദേവത സരസ്വതി, ധനധാന്യസമ്പദ്സമൃദ്ധിയുടെ അടിസ്ഥാനമൂർത്തി മഹാലക്ഷ്മി, ധർമ്മ സംരക്ഷണത്തിനുതകുന്ന വീര്യ പരാക്രമത്തിൻ്റെ ഈശ്വരി ദുർഗ, മഹാകാളി, ചണ്ഡിക എന്നിങ്ങനെ എത്രയോ അമ്മദൈവങ്ങൾ !
ആശ്വിന നവരാത്രി (കന്നി), ചൈത്ര നവരാത്രി (മേടം) എന്നിവ പരാശക്തി ഉപാസനയ്ക്ക് പ്രാധാന്യമുള്ള ദിവസങ്ങളായി കണക്കാക്കുന്നു.
ആശ്വിനമാസത്തിലെ കറുത്തവാവ് കഴിഞ്ഞ് പ്രഥമ മുതൽ ദശമി വരെയുള്ള പത്തുദിവസങ്ങളാണ് ആശ്വിന നവരാത്രിസാധനയ്ക്ക് ഉപയോഗിക്കുന്നത്. (ഒമ്പത് രാത്രിയും ദശമി ദിവസം പകലും ചേർന്നതാണ് ഈ വ്രതം). ജഗദംബിക, ചണ്ഡിക, ചാമുണ്ഡി, ദുർഗ, ഭദ്രകാളി, സരസ്വതി, മഹാലക്ഷ്മി ദശമഹാവിദ്യകളായ മഹാകാളി, താര, ബഗളാമുഖി, ഛിന്നമസ്ത, ധൂമാവതി, ഭുവനേശ്വരി, ഷോഡശിത്രിപുരസുന്ദരി, ത്രിപുരഭൈരവി, മാതംഗി, കമല എന്നിങ്ങനെ മഹാദേവിയുടെ വിവിധഭാവങ്ങളെയെല്ലാം ആരാധിക്കാനുള്ള ദിവ്യ മുഹൂർത്തമായി താന്ത്രികർ നവരാത്രിയെ ഉപയോഗപ്പെടുത്തുന്നു. ആർഷഗുരുപരമ്പരയിൽ നിന്ന് സാധനാരഹസ്യം സ്വീകരിച്ച് ഉപാസന ചെയ്യുക.
പല അസംബന്ധകഥകൾ ഇതിൻ്റെ പേരിൽ പ്രചരിപ്പിക്കപ്പെടുന്നുണ്ട്. സ്വാധ്യായബുദ്ധിയോടെയാണ് എല്ലാം പഠിക്കേണ്ടത് എന്നാണ് സനാതനധർമ്മ പാരമ്പര്യം. അതിനാൽ അബദ്ധകഥകളെ തള്ളിക്കളയുകയും വ്യക്തിക്കും സമാജത്തിനും ഗുണം നൽകുന്ന തത്വങ്ങൾ സ്വീകരിക്കുകയും ചെയ്യുക.
ദുർഗാഷ്ടമി ദിവസം തൻ്റെ ആയുധങ്ങളെല്ലാം പരാശക്തിയ്ക്ക് സമർപ്പിക്കുക, ആയുധപൂജ നിർവ്വഹിക്കുക, വിജയദശമിക്ക് ലോക നന്മയ്ക്കായി ഈശ്വരാനുഗ്രഹത്തോടെ അവ വീണ്ടെടുക്കുക (പൂജവയ്പ് – ആയുധപൂജ – പൂജയെടുപ്പ്) എഴുത്തിനിരുത്ത് എന്നീ സമ്പ്രദായങ്ങളെല്ലാം നവരാത്രി വ്രതത്തിൻ്റെ പ്രത്യേകതകളാണ്. മലയാളികൾക്ക് സരസ്വതി ഓണവുമാണ്.!
തിന്മയുടെ മേൽ നന്മയുടെ വിജയം വിളിച്ചോതുന്ന ഈ പുണ്യദിനത്തിൽ എല്ലാവർക്കും വിജയദശമി ആശംസകൾ! ലോകത്തെ ബാധിക്കുന്ന എല്ലാ വിധത്തിലുമുള്ള ആസുരികശക്തികളെയും ദൂരീകരിച്ച് ധർമ്മത്തിൻ്റെ ആത്യന്തികവിജയം നേടാനായി നമുക്ക് ഒരുമിച്ച് പരിശ്രമിക്കാം!
(ആർഷവിദ്യാസമാജം)