സങ്കുചിതമായ ഏകദൈവവിശ്വാസത്തിന്റെ അസഹിഷ്ണുത

പോർത്തുഗീസ് കപ്പലുകളിലെല്ലാം നാവികർക്കു പുറമേ കച്ചവടക്കാരും പടയാളികളും പാതിരിമാരും ഉണ്ടായിരുന്നു. ആ മിഷനറിമാർക്ക് ശമ്പളം കൊടുത്തുകൊണ്ടിരുന്നത് പോർത്തുഗീസ് ഭരണമായിരുന്നു.

 

 

“ക്രിസ്ത്യൻ വിശ്വാസസംബന്ധമായ കൂറും അത് പരിരക്ഷിച്ചു വർദ്ധിപ്പിക്കേണ്ട വ്യഗ്രതയും ഓരോ ക്രിസ്ത്യൻ രാജാവും ഹൃദയത്തിൽ വെച്ചുപുലർത്തേണ്ടതുണ്ട്. അങ്ങനെ നോക്കുമ്പോൾ ഇന്ത്യയിൽ നമ്മുടെ അധീനത്തിലുള്ള പല ഭാഗങ്ങളിലും മാത്രമല്ല നമ്മുടെ രാജധാനിയായ ഗോവയിൽ പോലും, അതായത് നമ്മുടെ വിശ്വാസം നേരാം വണ്ണം വർദ്ധിക്കണമെന്ന് പ്രതീക്ഷ പുലർത്തുന്ന കേന്ദ്രങ്ങളിൽപോലും വിഗ്രഹപൂജ നടക്കുന്നു, പാഷണ്ഡമായ ആചാരങ്ങൾ സ്വാതന്ത്ര്യത്തോടെ അനുഷ്ഠിക്കപ്പെടുന്നു. നമുക്ക് വിശ്വസനീയമായി കിട്ടിയ വിവരമാണിത്. അത് നമ്മെ നൊമ്പരം കൊള്ളിക്കുന്നു. അതുകൊണ്ട് നാം കൽപ്പിക്കുന്നതെന്തെന്നാൽ, ശുഷ്ക്കാന്തിയുള്ള ഉദ്യോഗസ്ഥരെ നിയോഗിച്ച് ആ വിഗ്രഹങ്ങളെല്ലാം കണ്ടെത്തി കണ്ടുകെട്ടി അവയെ തച്ചുടച്ചു നശിപ്പിക്കുക; ലോഹമോ മരമോ മണ്ണോ കല്ലോ മറ്റെന്തെങ്കിലും കൊണ്ടോ മൂർത്തികൾ വരയ്ക്കുകയോ വാർക്കുകയോ കൊത്തിയുണ്ടാക്കുകയോ ചെയ്യാൻ മുതിരുന്നവരെ കഠോരമായി ശിക്ഷിക്കുമെന്ന് പ്രഖ്യാപിക്കുക; മറ്റെവിടെ നിന്നെങ്കിലും അവ കൊണ്ടുവരുന്നവരേയും അതുപോലെ ശിക്ഷിക്കുമെന്ന് പ്രഖ്യാപിക്കുക. സ്വകാര്യമായോ പരസ്യമായോ അവയേറ്റി കൂത്താടുന്നവരെയെല്ലാം അതേ ശിക്ഷയ്ക്ക് വിധേയമാക്കുമെ ന്നും പ്രഖ്യാപിക്കുക. അവയ്ക്കുമുമ്പിൽ ചന്ദനത്തിരിയോ സമ്പ്രാണിയോ കർപ്പൂരമോ കത്തിച്ചുവെയ്ക്കുന്നവരേയും ശിക്ഷയിൽനിന്ന് ഒഴിവാക്കില്ലെന്ന് പ്രഖ്യാപിക്കുക. ക്രൈസ്തവകർമ്മമാർഗത്തിന്റെ പ്രഖ്യാപിത ശത്രുക്കളായ ബ്രാഹ്മണരെ തുണയ്ക്കുകയോ ഒളിവിൽ പാർപ്പിക്കുകയോ ചെയ്യുന്നവരെ കഠിനമായി ശിക്ഷിക്കുമെന്ന് പ്രഖ്യാപിക്കുക….. ദയാദാക്ഷിണ്യം കാണിക്കാതെ യാതൊരപേക്ഷയ്ക്കും വഴങ്ങാതെ നിശിതമായ നടപടികളിൽകൂടി കഠിനമായ ശിക്ഷ നടപ്പാക്കുന്നതിലാണ് നമുക്ക് സന്തോഷം എന്നോർമ്മയിരിക്കട്ടെ.”