ജനുവരി 2: മന്നം ജയന്തി – ആർഷ വിദ്യാ സമാജത്തിൻ്റെ ലേഖനം
AVS
മന്നം,1914 ഒക്ടോബർ 31-ന് നായർസമുദായഭൃത്യജനസംഘം രൂപീകരിച്ചു. 1917-ൽ അത്, നായർ സർവീസ് സൊസൈറ്റി (എൻ.എസ്.എസ്) എന്ന് പുനർനാമകരണം ചെയ്യപ്പെട്ടു. സൊസൈറ്റിയുടെ ആദ്യ ജനറൽ സെക്രട്ടറിയായി തിരഞ്ഞെടുക്കപ്പെട്ടതും അദ്ദേഹമായിരുന്നു. സാമൂഹ്യ പരിഷ്കരണത്തോടൊപ്പം, നായർ സമുദായത്തിന്റെ ഉന്നമനത്തിനുമായി ജീവിതം ഉഴിഞ്ഞുവെച്ച അദ്ദേഹം ‘പിടിയരിയും ഉത്പന്നപ്പിരിവും’ നടത്തി സ്കൂൾ- കോളേജ് ഉൾപ്പെടെ ധാരാളം വിദ്യാഭ്യാസ സ്ഥാപനങ്ങൾക്കും വിവിധ സംരംഭങ്ങൾക്കും മറ്റു സ്ഥാപനങ്ങൾക്കും തുടക്കം കുറിച്ചു. ചങ്ങനാശ്ശേരിയിൽ എൻ. എസ്. എസ് ഹിന്ദു കോളേജ് സ്ഥാപിച്ചത് അദ്ദേഹമായിരുന്നു. കൂടാതെ ഒറ്റപ്പാലത്തും പന്തളത്തും എൻ. എസ്. എസ് കോളേജുകളും പാലക്കാട് എൻജിനീയറിങ് കോളേജും തുടങ്ങിയത് മന്നമായിരുന്നു. വിദ്യാഭ്യാസ സ്ഥാപനങ്ങൾ തുടങ്ങുക മാത്രമായിരുന്നില്ല,അധ്യാപകനായും അദ്ദേഹം സേവനമനുഷ്ഠിച്ചിട്ടുണ്ട്. പിന്നീട് അഭിഭാഷക വൃത്തിയിലും തൻ്റെ പ്രഗത്ഭ്യം അദ്ദേഹം തെളിയിച്ചു.
നായർ സമുദായത്തിൽ അന്ന് നിലനിന്നിരുന്ന എല്ലാ അനാചാരങ്ങളും ആർഭാടങ്ങളും തർക്കങ്ങളും അവസാനിപ്പിക്കാൻ വേണ്ടി അദ്ദേഹം അഹോരാത്രം പ്രവർത്തിച്ചു. ചെറുപ്പക്കാരെ അണിനിരത്തിയുള്ള ശുദ്ധീകരണ വിപ്ലവമാണ് മന്നം നടത്തിയത്. “കരയുന്നവന് ജീവിക്കാനുള്ള ലോകമല്ല ഇന്നത്തേത്. പൗരുഷത്തോടുകൂടി കാര്യം പറയുന്ന ധൈര്യശാലികൾക്ക് മാത്രമേ ജീവിക്കാൻ മാർഗ്ഗമുള്ളു” – തുടങ്ങിയ ആശയങ്ങളിലൂടെ യുവാക്കളെ പ്രചോദിപ്പിച്ചാണ് അദ്ദേഹം സംഘടനാ പ്രവർത്തനം നിർവഹിച്ചത്.