ಇಂದು (21/04/2026): ಶ್ರೀ ಶಂಕರ ಜಯಂತಿ

ಬುದ್ಧ-ಜೈನ ಮತಗಳ ಮತ್ತು ತತ್ವಚಿಂತನೆಗಳ ನಿರಂತರ ಆಕ್ರಮಣದಿಂದಾಗಿ ಪ್ರತಿರೋಧಿಸಲೂ ಸಾಧ್ಯವಾಗದೆ ಅಸಹಾಯಕರಾದ ಸಜ್ಜನರನ್ನು ರಕ್ಷಿಸಲು ಮತ್ತು ಸನಾತನ ಧರ್ಮದ ಪುನಃಸ್ಥಾಪನೆಗಾಗಿ ಮೃತಸಂಜೀವಿನಿಯಾಗಿ ಶ್ರೀ ಶಂಕರರು ಅವತರಿಸಿದರು! ದಾರ್ಶನಿಕ ಮತ್ತು ಮತಪರವು ಆದ ತುಲನಾತ್ಮಕ ಚರ್ಚೆಗಳ ಮೂಲಕ ಸನಾತನ ಧರ್ಮದ ಮಹತ್ವವನ್ನು ಮನವರಿಕೆ ಮಾಡಿಕೊಡಲು ಮತ್ತು ಅದ್ವೈತ ವೇದಾಂತಕ್ಕೆ ತರ್ಕಬದ್ಧವಾದ ವ್ಯಾಖ್ಯಾನ ನೀಡಲು ಸ್ವಾಮಿಗಳಿಗೆ ಸಾಧ್ಯವಾಯಿತು! ಅಂದು ಶ್ರೀ ಶಂಕರರು ಸಂವಾದಕ್ಕಾಗಿ ಉಲ್ಲೇಖಿಸಿದ ಪೂರ್ವಪಕ್ಷ ಶ್ಲೋಕಗಳ ಮೂಲಕವೇ ಕಾಲಕ್ರಮೇಣ ನಾಮಾವಶೇಷವಾದ ಹಲವು ತತ್ವಚಿಂತನೆಗಳ ಆಶಯಗಳು ಇಂದಿಗೂ ಅಸ್ತಿತ್ವದಲ್ಲಿವೆ!! ಉದಾಹರಣೆ: ಲೋಕಾಯತ. ದರ್ಶನ, ತತ್ವಚಿಂತನೆ ಮತ್ತು ಮತದ ಕ್ಷೇತ್ರಗಳಲ್ಲಿ ಶ್ರೀ ಶಂಕರರು ಮಂಡಿಸಿದ ವಿಚಾರಗಳ ಬಗ್ಗೆ ಅಂದಿನಿಂದ ಇಂದಿನವರೆಗೆ ಪರ-ವಿರೋಧದ ಆಳವಾದ ಅಧ್ಯಯನಗಳು ಮತ್ತು ಚರ್ಚೆಗಳು ನಡೆಯುತ್ತಲೇ ಇವೆ! ಬ್ರಹ್ಮಸೂತ್ರ, ಭಗವದ್ಗೀತೆ ಮತ್ತು ಉಪನಿಷತ್ತುಗಳ ಭಾಷ್ಯದಿಂದ ಆರಂಭವಾದ ಸಂವಾದಗಳು ಇಂದಿಗೂ ನಿಂತಿಲ್ಲ! ಅದ್ವೈತ ಚಿಂತನಾ ಪದ್ಧತಿಗೆ ಸಾರ್ವತ್ರಿಕ ಸ್ವೀಕಾರಾರ್ಹತೆ ಮತ್ತು ಮನ್ನಣೆಯನ್ನು ಗಳಿಸಿಕೊಡುವಲ್ಲಿ ಸ್ವಾಮಿಗಳು ಯಶಸ್ವಿಯಾಗಿದ್ದಾರೆ ಎಂಬುದು ನಿಸ್ಸಂದೇಹ.

ಅತ್ಯಂತ ಸೂಕ್ಷ್ಮಮತಿಗಳಿಗೆ ಮಾತ್ರ ಅರ್ಥವಾಗುವ ದಾರ್ಶನಿಕ ಚರ್ಚೆಗಳು ಸಾಮಾನ್ಯ ಜನರ ಆಧ್ಯಾತ್ಮಿಕ ವಿಕಾಸಕ್ಕೆ ಉಪಯುಕ್ತವಲ್ಲ ಎಂದು ಅರಿತಿದ್ದರಿಂದ, ಹಲವಾರು ದಿವ್ಯ ಸ್ತೋತ್ರ ಕೃತಿಗಳ ರಚನೆಯ ಜೊತೆಗೆ; ಪರಮಶಿವ, ಆದಿಶಕ್ತಿ, ಗಣಪತಿ, ಸ್ಕಂದ, ವಿಷ್ಣು ಮತ್ತು ಸೂರ್ಯರ ಉಪಾಸನೆಗಾಗಿ ‘ಷಣ್ಮತ’ ಪದ್ಧತಿಯನ್ನು ಶ್ರೀ ಶಂಕರರು ಜಾರಿಗೆ ತಂದರು. ಅದರೊಂದಿಗೆ ‘ದಶನಾಮಿ’ ಸಂಪ್ರದಾಯದ ಮೂಲಕ ಸನ್ಯಾಸತ್ವವನ್ನು ವ್ಯವಸ್ಥಿತಗೊಳಿಸಿದರು. ಸನಾತನ ಧರ್ಮದ ಪ್ರಚಾರಕ್ಕಾಗಿ ಕಾಂಚಿ ಕಾಮಕೋಟಿ ಪೀಠದ ಹೊರತಾಗಿ, ನಾಲ್ಕು ಮಠಗಳನ್ನು ಶ್ರೀ ಶಂಕರರು ಸ್ಥಾಪಿಸಿದರು. ಉತ್ತರದ ಬದರಿಯಲ್ಲಿ ಜ್ಯೋತಿರ್ಮಠ, ಪಶ್ಚಿಮದ ಗುಜರಾತ್‌ನಲ್ಲಿ ದ್ವಾರಕಾ ಪೀಠ, ದಕ್ಷಿಣದ ಶೃಂಗೇರಿಯಲ್ಲಿ ಶಾರದಾ ಪೀಠ ಮತ್ತು ಪೂರ್ವದ ಪುರಿಯಲ್ಲಿ ಗೋವರ್ಧನ ಮಠ – ಇವುಗಳೇ ಚತುರ್ಮಠಗಳು. ನಾಲ್ವರು ಪ್ರಮುಖ ಶಿಷ್ಯರನ್ನು ಮಠಾಧೀಶರನ್ನಾಗಿ ಮಾಡಿದರು. ರಾಷ್ಟ್ರೀಯ ಏಕತೆಗೂ ಶ್ರೀ ಶಂಕರರು ದೊಡ್ಡ ಕೊಡುಗೆ ನೀಡಿದ್ದಾರೆ.

ಭಾಷ್ಯಗಳಲ್ಲದೆ, ದಿವ್ಯ ಸ್ತೋತ್ರಗಳು ಸೇರಿದಂತೆ ಸ್ವತಂತ್ರ ಕೃತಿಗಳನ್ನು (ಮೂನ್ನೂರಕ್ಕೂ ಹೆಚ್ಚು ಗ್ರಂಥಗಳು) ಅವರು ರಚಿಸಿದ್ದಾರೆ. ಭಾರತದಾದ್ಯಂತ ಸಂಚರಿಸಿ ಸಮಸ್ತ ಪಂಡಿತರಿಗೂ, ಚಿಂತಕರಿಗೂ ಸತ್ಯವನ್ನು ಬೋಧಿಸಿದ ‘ಶಂಕರ ದಿಗ್ವಿಜಯ’ವು ಸ್ವಾಮಿಗಳನ್ನು ಸರ್ವಜ್ಞ ಪೀಠಕ್ಕೇರಿಸಿತು! ಜಗತ್ತು ಅವರನ್ನು ಜಗದ್ಗುರು ಎಂದು ಅಂಗೀಕರಿಸಿತು.