20 ഫെബ്രുവരി – രാജർഷി ജനകാനന്ദജിയുടെ സമാധിദിനം
AVS
‘ആത്മീയ’ ഭാരതത്തിനും ‘വ്യാവസായിക’ അമേരിക്കയ്ക്കും ഇടയിൽ ഒരു സാംസ്കാരിക കൈമാറ്റം യോഗാനന്ദജി ആഗ്രഹിച്ചിരുന്നു. ജീവിതത്തിൽ സന്തുലിതമായ ഒരു സമീപനമാണ് വേണ്ടതെന്ന് ഗുരു പറഞ്ഞു. ബിസിനസ് പ്രധാനമാണെങ്കിലും ധ്യാനവും (സാധനയും) പ്രധാനമാണെന്ന് യോഗാനന്ദജി അഭിപ്രായപ്പെട്ടു. ഇത് സ്വജീവിതത്തിലൂടെ തെളിയിച്ച വ്യക്തിത്വമായിരുന്നു ജെയിംസ് ലിൻ.
1935-ൽ ഭാരതത്തിലേക്ക് യോഗാനന്ദജി തിരിച്ചുപോയിരുന്നു. ആ സമയത്ത് ലിൻ, കാലിഫോർണിയയിൽ ഒരു സമുദ്രതീര വസ്തു വാങ്ങി ഒരു ആശ്രമം നിർമ്മിച്ചു. യോഗാനന്ദജിയുടെ സ്വപ്നസങ്കല്പത്തിന്റെ സാക്ഷാത്കാരമായിരുന്നു ഈ ആശ്രമം.
അമേരിക്കയിൽ യോഗാനന്ദജി മടങ്ങിയെത്തിയപ്പോൾ, ഒരു അപ്രതീക്ഷിത സമ്മാനമായി ഈ ആശ്രമം ജെയിംസ് ലിൻ, ഗുരുനാഥന് സമർപ്പിച്ചു.
1951 ഓഗസ്റ്റ് 25 -ന് ലിൻ, ഗുരുവിൽ നിന്ന് സന്യാസ ദീക്ഷ സ്വീകരിക്കുകയും ‘രാജർഷി ജനകാനന്ദ’ എന്ന സന്യാസനാമം യോഗാനന്ദജി അദ്ദേഹത്തിന് നൽകുകയും ചെയ്തു.
യോഗാനന്ദജി തന്റെ പ്രിയശിഷ്യനായ രാജർഷി ജനകാനന്ദജിയെ സ്നേഹപൂർവം “Saint Lynn” എന്ന് വിശേഷിപ്പിച്ചിരുന്നു.
1952-ൽ സദ്ഗുരു യോഗാനന്ദജിയുടെ മഹാസമാധിക്ക് ശേഷം ജനകാനന്ദജി Self-Realization Fellowship (SRF) ന്റെ പ്രസിഡന്റായി (1952–1955) നേതൃത്വം വഹിച്ചു. യോഗാനന്ദജിക്ക് ശേഷം താനാണ് ഗുരുവെന്ന് ജനകാനന്ദജി അവകാശപ്പെട്ടില്ല. സിക്കുമതത്തിന്റെ അന്തിമഗുരു എന്ന നിലയിൽ ഗുരുഗ്രന്ഥ സാഹിബിന്റെ പദവിക്ക് സമാനമായ രീതിയിൽ SRF & YSS- സംഘടനയുടെ ഗുരു എന്നും ശ്രീ പരമഹംസ യോഗാനന്ദജി ആയിരിക്കുമെന്ന് നിശ്ചയിക്കപ്പെട്ടു.
ഒരു യഥാർത്ഥ ശിഷ്യൻ അഥവാ ഉത്തമ സാധകൻ എങ്ങനെയായിരിക്കണമോ ആ വിധം ജീവിച്ചു, പ്രവർത്തിച്ച് മാതൃക കാണിച്ച മഹത് വ്യക്തിത്വമായിരുന്നു രാജർഷി ജനകാനന്ദജി.
ലക്ഷക്കണക്കിന് ഡോളർ വില മതിക്കുന്ന തൻ്റെ സമ്പത്തിൻ്റെ ഭൂരിഭാഗവും SRF ന് സമർപ്പിച്ച ജനകാനന്ദജി 1955 ഫെബ്രുവരി 20- ന് മഹാസമാധിയായി.
ആ മഹാത്മാവിന്റെ പാദാരവിന്ദങ്ങളിൽ സാദര പ്രണാമങ്ങൾ!
ആർഷവിദ്യാസമാജം