മഹാകവി കുമാരനാശാൻ വിട വാങ്ങിയിട്ട് ഇന്ന് 102 വർഷം പൂർത്തിയാകുന്നു!

എസ്.എൻ.ഡി.പി. യോഗം സെക്രട്ടറിയെന്നനിലയ്ക്ക്, കേരളത്തിലെ പിന്നോക്ക സമുദായങ്ങളുടെ പുരോഗതിക്ക് വേണ്ടി കുമാരനാശാൻ വഹിച്ച പങ്കു നിസ്തുലമാണ്. സ്വപ്നജീവിയായ ഒരു കവിയായിരുന്നില്ല അദ്ദേഹം. അന്നത്തെ സാമൂഹിക യാഥാർത്ഥ്യങ്ങളുമായി നിരന്തരമിടപഴകിക്കൊണ്ടും അവയെ മാറ്റിത്തീർക്കാനുള്ള നവോത്ഥാന പരിശ്രമങ്ങളിലേർപ്പെട്ടുകൊണ്ടുമാണ് അദ്ദേഹം ജീവിച്ചത്. ആശാന്റെ കവിതകൾക്ക് അസാധാരണമായ ശക്തിവിശേഷം പ്രദാനം ചെയ്തത്, ഈ സാമൂഹികബോധവും ധാർമ്മിക പ്രതിബദ്ധതയും ആണ്.

നളിനി, ലീല, ചണ്ഡാലഭിക്ഷുകി, കരുണ, ദുരവസ്ഥ, പ്രരോദനം, ചിന്താവിഷ്ടയായ സീത തുടങ്ങിയ സ്വതന്ത്ര കൃതികൾക്ക് പുറമേ, ബുദ്ധചരിതം, സൗന്ദര്യലഹരി, ബാലരാമായണം -എന്നിവയുടെ വിവർത്തനങ്ങളും കുമാരനാശാൻ രചിച്ചിട്ടുണ്ട്. ഗദ്യ ലേഖനങ്ങൾ മൂന്നു വാല്യങ്ങളായി പ്രസിദ്ധീകരിച്ചു. അദ്ദേഹം പലർക്കും മറുപടിയായി എഴുതിയ ‘മതപരിവർത്തന രസവാദം’ എന്ന ഗ്രന്ഥത്തിന് ഇന്നും ഏറെ പ്രസക്തിയുണ്ട്.
1921-ലെ മാപ്പിള ലഹളയുടെ പശ്ചാത്തലത്തിൽ ആശാൻ രചിച്ച ‘ദുരവസ്ഥ’, യാഥാർത്ഥ്യങ്ങൾക്ക് നേരെ തുറന്നുവച്ച ഒരു കണ്ണാടി തന്നെയായിരുന്നു! എതിർപ്പുകൾ തൃണവത്ഗണിച്ചുകൊണ്ട്, തനിക്ക് ബോധ്യപ്പെട്ട സത്യങ്ങൾക്ക് വേണ്ടി നിലകൊണ്ടത് കൊണ്ടാവാം, അകാലത്തിൽ ആശാന് ഇഹലോക ജീവിതം അവസാനിപ്പിക്കേണ്ടി വന്നത്.

മലയാള കാവ്യലോകത്ത് ദീപ്തമായ സാന്നിദ്ധ്യമായി നിറഞ്ഞുനിൽക്കുമ്പോഴായിരുന്നു 1924 ജനുവരി 16-ന്,
വെളുപ്പിന് മൂന്നുമണിക്ക്, പല്ലനയാറ്റിൽ
‘റെഡീമർ’ ബോട്ടുമറിഞ്ഞുണ്ടായ അപകടത്തിൽ, കുമാരനാശാൻ അന്തരിച്ചത്. 51 വയസ്സേ അപ്പോൾ അദ്ദേഹത്തിനുണ്ടായിരുന്നുള്ളൂ. ദുരൂഹമായ ഈ അപകടം നടന്നത്, ബോട്ട് കൊല്ലത്ത് നിന്ന് ആലപ്പുഴയിലേക്കു പോകുമ്പോളാണ്.145 യാത്രക്കാരോളം ബോട്ടിലുണ്ടായിരുന്നു.
കുമാരനാശാന്റെ മൃതശരീരം അപകടം നടന്നതിന്റെ പിറ്റേ ദിവസമാണ്
കണ്ടെടുത്തത്. പല്ലനയാറ്റിൽ ഉണ്ടായ ഈ അപകടത്തിൽ ഭൂരിഭാഗം യാത്രക്കാരും രക്ഷപ്പെട്ടിരുന്നു. അപകടത്തെക്കുറിച്ചന്വേഷിച്ച കമ്മീഷന്റെ റിപ്പോർട്ട് പ്രകാരം മരണസംഖ്യ 25 -നും 35 -നും ഇടയ്ക്കാകുമെന്ന് അനുമാനിക്കുന്നു. ചില സാമൂഹിക വിരുദ്ധരുടെ കറുത്ത കരങ്ങൾ ഇതിന് പിന്നിൽ ഉണ്ടോ എന്ന സംശയങ്ങൾക്ക് ഇന്ന് ബലമേറുന്നു.